இவர் தாங்க உண்மையான குடிமகன்

புதுக்கோட்டை மாவட்டம் கொத்தமங்கலம் கிராமத்தில் வசிக்கும் விவசாயி
விஜயகுமார் தனக்கு வழங்கப்பட்ட இலவச தொலைக்காட்சிப் பெட்டியை திருப்பிக்
கொடுத்து இலவசத் திட்டங்களுக்கு சாட்டையடி கொடுத்திருக்கிறார்.

கடந்த 23-ம் தேதி கொத்தமங்கலம் கிராமத்தில் புதுக்கோட்டை மாவட்ட தி.மு.க.
செயலாளர் பெரியண்ண அரசு தலைமையில் இலவச வண்ணத் தொலைக்காட்சி வழங்கும்
விழா நடந்து கொண்டிருந்தது.அப்போது பயனாளிகள் பட்டியலில் இருந்து
விஜயகுமார் என்ற பெயர் வாசிக்கப்பட்டதும்,கொத்தமங்கலம் மணவாளன் தெருவைச்
சேர்ந்த விஜயகுமார் என்ற விவசாயி மேடையேறினார்.

அவருக்கு வழங்கப்பட்ட தொலைக்காட்சிப் பெட்டியை வாங்கிக் கொண்டார்.ஒரு
விநாடி அங்கே நின்றவர்,டி.வி.யை பெரியண்ண அரசுவிடமே திருப்பிக்
கொடுத்துவிட்டு,கூடவே ஒரு மனுவையும் கொடுத்தார்.ஏதோ கோரிக்கை மனு
கொடுக்கிறார் என்று அரசுவும் சாதாரணமாக வாங்கிப் படித்தார்.

அதில் ‘மனிதனுக்கு டி.வி. என்பது பொழுதுபோக்கு சாதனம்தான். ஆனால் அதைவிட
முக்கியமானது உணவு, உடை, உறைவிடம். தமிழகத்தில் மொத்தம் 88 துறைகள்
இருக்கின்றன. இவை தன்னிறைவு அடைந்து விட்டனவா? குறிப்பாக, விவசாயிகளைப்
பாதிக்கும் மின்சாரத்துறை தன்னிறைவு அடைந்து விட்டதா?

துறைகள் எல்லாம் தன்னிறைவு அடைந்த பிறகு மிதமிஞ்சிய பணத்தில் இந்த
டி.வி.யை வழங்கியிருந்தால் மகிழ்ச்சியாக இருந்திருக்கும். இதற்கு மட்டும்
எங்கிருந்து நிதி வந்தது?இந்தியாவின் முதுகெலும்பான விவசாயிகள்
தமிழகத்தில் அதிகம் வசிக்கிறார்கள். டி.வி. வழங்கும் பணத்தை வைத்து
விவசாயிகளுக்குத் தேவையான மின்சாரத்தைக் கொடுத்திருக்கலாம்.

தமிழகத்திலேயே மிகவும் பின்தங்கிய மாவட்டத்தைக் கண்டறிந்து போதுமான
மின்சாரத்தை தடையின்றிக் கொடுத்து அந்த ஒரு மாவட்டத்தையாவது தன்னிறைவு
அடையச் செய்திருக்கலாம். இலவசம் என்பது எங்களுக்கு வேண்டாம். தரமான
மருத்துவம், கல்வி, மும்முனை மின்சாரம் மற்றும் வேலை வாய்ப்புகளை
வழங்கினாலே போதும்.

அதை வைத்து நாங்களே சம்பாதித்து டி.வி.முதல் கார் வரை அனைத்தையும்
வாங்கிக் கொள்வோம். எங்களுக்கு என்ன தேவையோ அதை நாங்களே பூர்த்தி செய்து
தன்னிறைவு அடைந்து விடுவோம்.

விலைவாசி உயர்வு, எரிபொருள் விலை உயர்வு, குடிநீர் பற்றாக்குறை, லஞ்சம்,
ஊழல் என்று ஆயிரக்கணக்கான குறைகள் இருக்கும்போது ஒரு நடமாடும் பிணமாக
நான் எப்படி டி.வி. பார்க்க முடியும்? எனவே எனக்கு இந்த டி.வி. வேண்டாம்.
முதல்வர் கருணாநிதி மீது எனக்கு மிகுந்த மதிப்பும், மரியாதையும், அன்பும்
உள்ளது.

எனவே,இந்த டி.வி.யை அவருக்கே அன்பளிப்பாகக் கொடுக்க இந்த சந்தர்ப்பத்தைப்
பயன்படுத்திக் கொள்கிறேன்.அவர் இதை ஏற்றுக் கொள்ளாவிட்டால் என் மனம்
மேலும் வேதனைப்படும். அரசு மற்றும் அதிகாரிகள் தங்கள் கடமைகளை சரியாகச்
செய்தாலே போதும். இந்தியா வல்லரசாகிவிடும்’ என்று நீண்டது அந்த மனு.

இதைப் படித்த பெரியண்ண அரசு முகத்தில் ஈயாடவில்லை.அருகில் இருந்த
அதிகாரிகள் அதிர்ந்து போனார்கள். என்றாலும் அந்த மனுவையும் டி.வி.யையும்
வாங்கி வைத்துக் கொண்டு மேலும் பரபரப்பை உண்டாக்காமல் விஜயகுமாரை அனுப்பி
வைத்தார் அரசு.

இதன் பின்னர் விஜயகுமாரிடம் பேசினோம்.

“நான் ஒரு சாதாரண விவசாயி. விவசாயிகள் எல்லாம் மின்வெட்டால்
பாதிக்கப்பட்டு விளைநிலத்தை ரியல் எஸ்டேட்காரன்கிட்ட வித்துட்டு நகரத்துல
போய் கூலி வேலைக்கும்,ஹோட்டல் வேலைக்கும் அல்லாடிக்கிட்டிருக்கான்.

இந்த நிலை, நாளைக்கு எனக்கும் என் பிள்ளைகளுக்கும் வரப் போகிறது.
எதிர்காலத்தை நினைத்து மனம் கலங்கிப் போய் இருக்கிறது. ராத்திரியில
படுத்தால் தூக்கம் வர மாட்டேங்குது.

சாராயத்தை குடிச்சுட்டு, ஒரு ரூபாய் அரிசியை தின்னுட்டு உழைக்கும்
வர்க்கம் சோம்பேறியாகிக்கிட்டிருக்கு.ரொம்ப சீப்பா கணக்குப் போட்டாலும்
ஒரு டி.வி. ஆயிரம் ரூபாய்னு வச்சிக்குங்க. தமிழ்நாட்டில் ரெண்டு கோடி
குடும்ப அட்டைகள் இருக்கு.2கோடி குடும்ப அட்டைக்கும் டி.வி. கொடுத்தால்
இருபது லட்சம் கோடி செலவாகும்.இதை வைத்து 88 துறைகளையும் தன்னிறைவு
அடையச் செய்தாலே போதுமே.

கனத்த இதயத்தோடும், வாடிய வயிறோடும் இருக்குறவனுக்கு எதுக்கு டி.வி.?
அவன் பொழப்பே சிரிப்பா சிரிக்கும்போது அவன் டி.வி. பாத்து வேற
சிரிக்கணுமாக்கும்.அதுனாலதான் நான் டி.வி.யை திருப்பிக் கொடுத்தேன்’’
என்றார்.

டி.வி.யை திருப்பிக் கொடுத்த கையோடு முதல்வர் கருணாநிதிக்கு கடிதம்
ஒன்றையும் எழுதியிருக்கிறார் விஜயகுமார்.

அந்தக் கடிதத்தில் ‘கொத்தமங்கலத்துக்கு வந்த டி.வி.க்கள் 2519. அதில்
2518 மட்டும்தான் வழங்கப்பட வேண்டும். எனக்கான ஒரு டி.வி.யை எனது அன்புப்
பரிசாக நீங்கள் ஏற்றுக் கொள்ள வேண்டும்’என்று குறிப்பிட்டு அதை ஃபேக்ஸ்
செய்துள்ளார்.

மக்களிடம் இருந்து சுரண்டப்படும் பணத்தில் மக்களுக்கே கொடுக்கப்படும்
லஞ்சம் தான் இலவசங்கள் என்பதை விவசாயி விஜயகுமார் பொட்டில் அடித்தாற்போல்
தெளிவுபடுத்தியுள்ளார். மக்களை சோம்பேறிகளாக்கும் இலவசத்துக்கு எதிராக
போர் தொடுத்திருக்கும் அவரை பாராட்டத்தான் வார்த்தைகளே கிடைக்கவில்லை

Advertisements

தேர்தல் சிறப்புக் கட்டுரை-தமிழ்நாடா ? இலவச நாடா ?

தமிழகத்தின் இரண்டு பெரிய திராவிட கட்சிகள் வெளியிட்ட தேர்தல் அறிக்கையைப் படித்த பின்பு அழுவதா சிரிப்பதா என்றே தெரியவில்லை. ஆனால் ஒன்று மட்டும் தெளிவாய்த் தெரிகிறது. பதவியைப் பிடிக்க இவர்கள் “எந்த” எல்லைக்கும் போவார்கள்.


தானாக கனிந்து வந்த வாய்ப்பை, தானாக தன்னிச்சையாக முடிவெடுத்து, வைகோவை துரத்திவிட்டு, தான் இன்னும் திருந்தவில்லை என்பதை அழுத்தமாய் நிருபித்த ஜெயலலிதாவின் போக்கு சோர்ந்து கிடந்த கலைஞருக்கு வசதியாய்ப் போய்விட்டது. மக்கள் நமக்கு லஞ்சம் தந்த காலம் மாறி, நாம் மக்களுக்கு லஞ்சம் தந்து சென்ற முறை ஆட்சியைப் பிடித்ததைப் போல் இந்த முறையும் பிடிக்கலாம், இன்னும் அதிகமாய் லஞ்சம் தந்து…. என்றெண்ண வைத்துவிட்டது.


சென்ற முறை, கலைஞருக்கு முன்னமே தேர்தல் அறிக்கையை வெளியிட்ட ஜெயலலிதா, இந்த முறை பொறுமையாய் காத்திருந்தார், ‘கதாநாயகியை’ மிஞ்சும் தாராளம் காட்ட…!


கலைஞர் தனது முதல் தேர்தலில் (1957) குளித்தலையில் ஆளுங்கட்சி வேட்பாளரை எதிர்த்து நின்றார். அப்போது ஆளுங்கட்சி வேட்பாளர் அப்பகுதி மக்களுக்கு குடங்களை இலவசமாய் தந்தார். இதைக் கண்ட ஏழை கருணாநிதி, “அந்த வேட்பாளர் வசதியானவர். குடம் தந்தார். என்னால் இந்தக் குடத்தில் தூசி விழாமல் தடுக்கும் மூடியைத்தான் தர முடியும். ஆனால் மறவாதீர்கள்….உங்கள் வாழ்க்கை முழுமைக்கும் இந்த மூடியைப் போல் நான் உங்களைப் பாதுகாப்பேன்” என்று சொல்லி வெற்றிப் பெற்றார். என்ன வினோதம்….அன்று மூடி…இன்று கோடி…! இதுதான் வளர்ச்சி என்பதா?


லாப்டாப் இலவசம்; பஸ் பாஸ் இலவசம்; அரிசி இலவசம்; மிக்ஸி இலவசம்; கிரைண்டர் இலவசம்; காற்றாடி இலவசம்; வீடு இலவசம்; ஆடு இலவசம்; மாடும் இலவசம்……கேடும் இலவசம்!!!! இது தமிழ்நாடா ? இலவச நாடா ?


மக்கள் நலத்திட்டப் பணிகளில் மட்டும் இந்த அரசியல்வாதிகள் எப்போதும் செய்வதை திருந்தச் செய்வதே இல்லை. அரிசி, மிக்ஸி, கிரைண்டர் இவற்றை இலவசமாய் கொடுத்துவிட்டால் போதுமா? மக்கள் அரிசியை ஊற வைக்க வேண்டும்; மாவாட்ட வேண்டும்; பின் சமையல் செய்ய வேண்டும்….எவ்வளவு வேலை? இதற்கு பதிலாய் வரப்போகும் அரசு, நேரடியாய் இட்லியும் கெட்டி சட்னியும் ஒவ்வொரு வீட்டுக்கும் விநியோகித்தால் என்ன? மக்கள் இன்னும் மகிழ்வார்கள் இல்லையா?


ஜெயலலிதாவின் தேர்தல் அறிக்கையப் படித்து விட்டு, மு.க.ஸ்டாலின் சொன்ன வார்த்தைகள் இவை –


” இந்த திட்டங்கள் எதையும் நிறைவேற்ற முடியாது. ஆட்சிக்கு வர மாட்டோம் என்ற நம்பிக்கையில் வாக்குறுதிகளை அள்ளி வீசுகிறார் ஜெயலலிதா. இவைகளை நிறைவேற்ற ஏது பணம்? “


அதைத்தானய்யா நாங்களும் கேட்கிறோம். ஜெயலலிதாவின் வாக்குறுதிகளை நிறைவேற்ற முடியாதெனில் உங்கள் வாக்குறுதிகளை மட்டும் எப்படி நிறைவேற்ற முடியும்? உங்கள் தேர்தல் அறிக்கையின் மேம்படுத்தப்பட்ட அறிக்கை தானே அதிமுகவினுடயது. இதை நிறைவேற்ற எங்கிருக்கு பணம்? டாஸ்மார்க் விற்ற பணம் தான் இதற்கெல்லாம் மூலதனமா?


“கள், சாராயக் கடைகளைத் திறந்து அதன் மூலம் கிடைக்கும் வருவாயில் தான் நான் ஆட்சியில் தொடர வேண்டும் என்றால், துண்டை உதறித் தோளில் போட்டுக்கொண்டு நடையைக் கட்டுவேன். கள், சாராயக் கடைகளைத் திறப்பது என்ற பேச்சுக்கு என்னுடைய ஆட்சியில் இடமே இல்லை” – இதைச் சொன்னது, உங்கள் தலைவர்களின் தலைவர் பேரறிஞர் அண்ணா அவர்கள். அவரது கொள்கையின் படி ஆட்சி செய்வதாய் மார்தட்டும் நீங்கள் இதை வசதியாய் மறந்தது ஏன்?

வருவாய் கோடி கோடியாய் கொட்டக் கூடிய துறைகள் பல உண்டு. தவறான வழியில் ஓர் அரசு தன் வருவாயை பெருக்கலாம் எனில், தவறான வழிகள் “அனைத்திலும்” ஓர் அரசு ஈடுபடலாமா? அரசின் முதலீடுகளும், வருமானங்களும் கொள்கை சார்ந்து இருக்கத் தேவையில்லை?


ஏற்கனவே தமிழ்நாட்டின் கடன் ஒரு லட்சம் கோடி (ஸ்பெக்ட்டரத்தில் அடித்ததது இதை விட அதிகம்) ! நீங்கள் அறிவித்த இலவச திட்டங்கள் அனைத்தும் அமல்படுத்தப்பட்டால், நமது கடன் மூன்று லட்சம் கோடியாய் அதிகரிக்கும். உங்கள் புண்ணியத்தில் ஒவ்வோரு தமிழனும் 45,454 ரூபாயை தன் கடனாய் சுமப்பான். நாளை ஒரு நேர்மையாளன் ஆட்சிக்கு வந்தால், உங்கள் இலவச திட்டங்கள் அனைத்தும் தூக்கி எறியப்படும். வரி உயர்த்தப்படும். இந்தக் கடன் அனைத்தும் இலவசங்களில் மயங்கும் மக்கள் தலையில் நாளை இடியாய் இறங்கும்! அப்போது அந்த நேர்மையாளனை சிலர் தூற்றவும் செய்வார்கள்! அதைப்பற்றி உங்களுக்கென்ன கவலை?


இத்தனை ஆண்டு கால ஆட்சியில், கொள்ளையடித்ததைத் தவிர நீங்கள் சாதித்தது என்ன? உங்களின் தீர்க்கதரிசனத்தால் மக்களை கையேந்திகள் ஆக்கியது தான் மிச்சம்!


ஆயிரம் சொன்னாலும் உங்களின் நிர்வாகத் திறனை பாராட்டித்தான் ஆக வேண்டும். அரசு அறிவிக்கும் திட்டங்கள் நேரடியாய் மக்களிடம் சென்று சேர்கிறதோ இல்லையோ…நீங்கள் லஞ்சமாய்த் தரும் பணம் மட்டும் இடைத்தரகர்களால் சுருட்டப்படாமல் நேரடியாய் மக்களை சென்றடைகிறது. அதைக் கண்காணிக்க தனித்தனி குழுக்கள் வேறு! யப்பா…..மலைக்க வைக்கும் நிர்வாகம்!


பொறுப்புடன் செயல்படும் கட்சிகளைப் பார்த்தால் எங்களுக்கு வெறுப்பு தான் மிஞ்சுகிறது.


உழைத்துண்ணும் சந்தோஷம் தெரியுமா உங்களுக்கு? இதை மறக்கடித்த உங்கள் ஆளுமையை எப்படி மெச்ச? நீங்கள் வாழிய பல்லாண்டு!


ஓர் சின்ன வேண்டுகோள் –
நீங்கள் நாற்காலியில் அமர, மக்களை சோம்பேறிகள் ஆக்கிவிட்டீர்கள். இனி ஒரு போதும் உங்களைத் தலைவர்கள் என்று சொல்லிக் கொள்ளாதீர்கள்!

தலை இருப்பவன் எல்லாம் தலைவன் இல்லை!
தேசத்தை தழைக்கச் செய்பவனே தலைவன்!

Thanx:Idhayakumar.K

COMMENT பகுதியில் உங்களின் கருத்துக்கள் வரவேற்கப் படுகின்றன.